Psa 48 | MMX | STEP | Leeme Silok i silok aleng. La i lox avukat aleng do ata emi asu amisik min to xeneng at lemenemen silok at ne Moroa atnedik la to bok at loxongkaana kaala ren.

Psalms 48

Saion Lemenemen Silok At Ne Moroa

1 Leeme Silok i silok aleng. La i lox avukat aleng do ata emi asu amisik min to xeneng at lemenemen silok at ne Moroa atnedik la to bok at loxongkaana kaala ren. 2 Saion neni mo lakaana at ne Moroa, no xa it kis kasep pana la i maraanu aleng; ni lemenemen silok at Loorong Silok, ik lox amomo limixin axap at na lavatbung menemen. 3 Moroa gara lox ase limixin do dinaba nemen avukat mene ro xeneng at laraugu matmatkun at na lemenemen silok.

4 Lavaorong silok eburu mi limixin esep atdi diga vot buru la diga lok do dina esep polo limixin boro at lakaana Saion. 5 Ketla diga ven mo lakaana la diga sangu aleng, diga marat la diga sixiro. 6 Diga dede xapmek tino mi lanmarat, la diga lingun, ngan ta latkin i gagas kusu na visik. 7 Lodoxoma atdi gak sixit saasa ngan lempattaaxup dik sixit ekarakat to at laras keneng at langsangan lamanman.

8 Nema magara ronga vam levelinga at levempanga sangsangu ne Moroa gak lox i, la mara ven pam i ro at lemenemen silok at ne Moroa atnema; ni Leeme Silok la ne Lanaraavuk, naba lok tatao amisik mo lemenemen silok at levenaleng axap i tu melamgo.

9 O Moroa, to xeneng at loogu laplavang taram ma doma asu at langsangan labalamu lexen taram . 10 Limixin at levengkot axap di emi asu aleng minu, la limixin at levengkot axap at na lavatbung menemen dira ronga levelinga mumu u. Nenu um gomgonga limixin mi levelinga mokmokso ting tonga ina. 11 Kuren la limixin axap di nemen to at lakaana Saion dina momo! Nu ung tonga linga mi lodoxoma manmanton; kuren la limixin axap boro at levengkot silok Judaia dina momo.

12 Nemi limixin at ne Moroa, mina vas kangkan lemenemen Saion, la mina exes laraugu likling i baalom upana. 13 Mina ven katling axap larangas uat la mina reven anga bok laraugu matmatkun, kusu minaba tong avolo i rinedi lavaola melemu. 14 Mina tong i ridi do na ne Moroa atnedik, neni ne Moroa atnedik at levenaleng axap i tu melamgo. Ni nabam gomgonga dik at levenaleng axap naba vot melemu.